المصطلح في الوطن العربي يعاني و بشده من عدم الوضوح و ذلك بسبب القصور الشديد في طريقه تدريس اللغة العربية التى قد تصل بالطالب لحد الإكتئاب و الصرع ( أتذكر وقت ان كنت طفلا رقيقا انتظر أجازة منتصف العام لألهو فيها مع أصدقائي لأجد مدرسة العربي تطلب من الفصل كتابة كتاب القراءة ).

لهذا و بسبب طريقه التدريس الفاشلة العقيمة زهد طلاب كثيرون هذه اللغة ووجدوا ضالتهم في الإنجليزية و الفرنسية و أحيانا لغات أخرى

و مع هذا الزهد للغتنا العربية الجميله ووجود كثيرون من ( الممحي أميتهم ) في مصر فلقد ظهرت مصطلحات و مصطلحات

و المصطلح الآن أصبح تقليعة بل و حركة فنية غالبا ما يتزعمها فنان أو راقصة لبقة مثقفة ليتحدثوا بها أمام وسائل الإعلام و آخر هذه المصطلحات مثلا لفظ ( جامد آخر حاجة ) ..و مصطلح ( آخر حاجة مقصود به منتهى الشيء او اللي مفيش بعده و مفيش زيه )

فتجد الفنانه الفلانية تخرج بلسانها الملتوي و تقول الفيلم كان جامد آخر حاجة متبوعه بضحكات قصيرة سخيفة

و تخرج فتجد هذا الرياضي الكبير اللذي يكتسح الفضائيات يردد نفس الكلمة ( ده لاعيب جامد آخر حاجة ) – يا أخي عيب على شيبتك – سبت ايه للأشبال –

و لهذا لم يكن من المستبعد أن يكون هناك أحد البرامج الفضائية قد اسمها ( جامد آخر حاجة ) و ظهور اغنية أخرى اسمها (بحبك آخر حاجة)

لا مشكلة لدي في المصطلح و ان كنت لن اتقبله بسهوله و لكن المشكلة في الإغراق الذي نالني من هذا اللفظ في كل مكان أذهب اليه …

نترك هذا اللفظ و نذهب لآخر و هي كلمة ( حد ) …

فمثلا عندما اشيد بأخلاق انسان معين اقول ( هذا أنسان كويس ) فتجد البعض قد استبدل لفظ الانسان بكلمة ( حد ) فتكون الجملة ( علاّن ده حد كويس ) و ايضا سمعتها من نفس المذيع الرياضي الشهير يرددها ( ابو تريكة حد جميل )

لا اعلم لماذا استبدلنا لفظ انسان بكلمة حد …الى هذا الحد ؟

ننتقل لمصطلحات أخرى مثل روش – جامد-بييس يا مان – استمورننج – نهيس – دماغك – اتشبح ضرب – تحش – إتم – امبلايز ( سمعتها اكثر من مرة من أحد الدعاة الجدد ) – أستكانيس – إفتكاسات – تعبان موله - …إلى آخره

و لكن هل تصلح هذه المصطلحات في عالم السياسة !؟

هل نستيقظ ذات يوم ليخرج علينا أحد المسئولين يتحدث في السياسة على هذا النمط ..تعالوا نتخيل كيف سيكون شكل الخطاب …

يدخل أحد المسئولين الإجتماع - ( مسقّط البنطلون و مبين البوكسر, شعره مضروب جل حتى الأعماق , التي شيرت مقطّع من الاأكمام …) – قائلا :

بييس عليكوا , أخباركوا ايه يا رجاله ؟

كلنا بيس يا مان أخبارك انت ايه يا برنس

تماموس – عايزين نولع الاجتماع النهاردة علشان في تقارير عايز اعرضها على البيج بوس .

ماشي يا ريس انت تقشر و احنا ننفذ يا كبير

المسول يبدي بعض الأهمية في كلماته :

امبارح انا كنت مع وزير ال ( …) و بصراحة لقيته بيفتكس و كلامه كله في الأمبلايز قلت له لاء يا روش اثبت عيب ده انا عمك و بينت له انه دونكي و مبيفهمش .

المسئولين :

- قشطة يا برنس عليك انت رزعتله ..و بعدين .

- مفيش قاللي بيني و بينك البيج بوس بتعنا احنا الاتنين فأنتوا ايه نظامكوا ؟

- احنا معاك للآخر …

- الحاجة التانية كنت مع وزير خارجية دوله ( …) و بصراحة لقيته ( حد جميل ) و كلامه ( بيمخمخني آخر حاجة ) ..فأنا نويت اظبط معاه على الإتفاقية الجددة و كله في مصلحة إيجي …

- إيجي مين يا برنس ..

- إيجي يعني مصر يا روش منك له

يقف الوزيران أمام البيج بوس …

الأول : صباحك نادي يا بوس ..

الثاني : ابوس الهيد بتاعتك يا كبير ..

البيج بوس : اهلا ياض منك له عايزين ايه الاستمورننيج بتاعتكوا مش عجباني ..

العفو يا بوس احنا خدامينك بس هوه موضوع عن الإتفاق ال …

البيج بوس : اتفاق ايه يا صايع منك له امشي ياض انا عايز اتخمد ..ده انتوا تعبانيين موله صحيح …

ثم يصيح :

الفلكة يا مسرور ….

فيهرب المسئولان من أمامه كالصراصير …